امبارح لما زرت معهد الأورام غصب عني لقيت عيني وعقلي بيعملوا مقارنة
مقارنة غير مقننة لكن اعتقد انها حقيقية جداً
كنت بقارن بين الحالة الصحية للأطفال اللي أهاليهم متماسكة وعندها أمل أو ع الأقل بتتظاهر بكده قدام اولادهم
وبين اللي أهاليهم مكتئبين وزعلانين ورافضين ان اولادهم يتحركوا او يلعبوا علشان
" دا تعبان سيبوه في اللي هو فيه "
بجد لاحظت ان اللي أهاليهم متماسكين وبيحاولوا يبتسموا ويتماسكوا صحتهم بتتحسن نوعاً ما
ولاحظت ان اولادهم قادرين يلعبوا ويتحركوا ويتنططوا
وإلى حد ما مش حاسين أوي ان المرض كابوس
لكن اللي اهاليهم العكس مكتئبين ومكشرين والموضوع قالب معاهم بعنف بيضربوا أي حد وجامد أوي
خلوا بالكم يا جماعة بجد ممكن نبقى زي الدبة اللي قتلت صاحبها من الحب
اركنوا خوفكم ع جنب
اركنوا حزنكم على جنب
واتعاملوا مع الموقف بطريقة عملية
مدام روحتوا لجأتوا للعلاج يبقى فيكم امل ولو جزء صغير جواكم فيه امل
كبروه بالتفاؤل والثقة في ربنا
خلوا الإرادة تبقى اكبر من المرض وهي هتهزمه
اللي يخاف من العفريت بيطلع له
فإوعوا تخافوا م الموت
ولو حتى انت حد مش متفاءل وخلاص قفلت معاك انها ايام وبيقضيها
فليه تخليه يقضيها في كآبة وحزن ؟؟ ما يقضيها مبتسم متفاءل
وكفاية عليه وجع المرض والعلاج بلاش يبقى كمان وجع الحزن
0 comments:
Post a Comment